பாலாவின் COME-BACK

ஆரண்ய காண்டம் படத்திற்குத் தான் விமர்சனப்பதிவு எழுதுவதாய் ஆரம்பத்தில் திட்டம். ஆனால் அவன் இவன் படம் பற்றிய என் ஒற்றை ட்விட்டிற்கு வந்த பரவலான எதிர்வினைகள் திட்டத்தை திசை திருப்பி விட்டது. ஆனால் குறையொன்றுமில்லை.

ஆரண்ய காண்டம் பற்றி நான் சொல்ல‌ நினைத்திருந்த கிட்டதட்ட அனைத்து விஷயங்களைப் பற்றியும் பதிவுலகமே ஒன்று கூடிக் கொண்டாடித் தீர்த்து விட்டது. போதாதற்கு சாரு வேறு ஜூலை மாத உயிர்மையில் பாராட்டவிருப்பதாய்த் தெரிகிறது. அதன் வியாபார வெற்றி பற்றித் தெளிவில்லை. ஆனால் அதை விட ஆக முக்கிய சங்கதியொன்று உண்டு - அது தமிழகத்தில் அறிவுஜீவிகளென அறியப்படுபவர்கள் மத்தியில் படத்தைப் பற்றிய மதிப்பீடு. இவ்விஷயத்தில் ஆரண்ய காண்டம் எகோகபித்த ஆதரவைப் பெற்று‌ நல்ல போஷாக்கான குழந்தையாக‌த் தான் வலம் வருகிறது.

பாவம், அவன் இவன் தான் கவனிப்பாரற்றுக் கிடக்கும் சவலைப்பிள்ளை.

இன்னொரு விஷயத்தையும் சொல்லி விடுகிறேன். அவன் இவன் பட‌த்தை நான் எதிர்மறை எதிர்பார்ப்பினோடு தான் அணுகினேன். பத்து வருடங்கள் முன்பு அவர் எடுத்த இரண்டு நல்ல படங்களை மனதில் கொண்டு பாலா படம் பார்ப்பது ஒரு கடமை போல் என்ற அளவிலான மதிப்பையே அதற்களித்துப் படம் பார்க்கச் சென்றேன்.

அதற்கு மூன்று முக்கியக் காராணங்கள். தனது கடைசி இரண்டு படங்களிலும் தான் எவ்வள‌வு மோசமானதொரு திரைக்கதையாளன் என்பதைத் தொடர்ந்து நிரூபித்தவர் பாலா என்பது முதலாவது. உன்னாலே உன்னாலே தவிர இதுகாறும் வேறு எந்தத் திரைப்படத்திலும் சொல்லிக்கொள்ளும் படியான வசனங்களே எழுதியிராதவர் எஸ்.ராமகிருஷ்ணன் என்பது இரண்டாவது. மூன்றாவதும் முக்கியமானதும் கடைசியுமானது, பொதுவாக பாலா படங்களின் உயிர் நாடியான இளையராஜா இப்படத்தில் பணியாற்றவில்லை என்பது. இதில் முதலிரண்டு காரணங்களைப் பற்றியும் என் எண்ணத்தை மாற்றிவிட்டது அவன் இவன்.

அவன் இவன் படம் ஏன் எனக்குப் பிடித்திருக்கிறது? பார்க்கலாம்.

இரண்டு முக்கிய விஷயங்களுக்காக அவன் இவன் படத்தை நான் கடுமையாக (ஆம், கடுமையாக!) ஆத‌ரிக்கிறேன். ஒன்று தமிழ் சினிமா நகைச்சுவையில் இது ஒரு முக்கியமான மற்றும் புதுமையான வகைமை. மற்றொன்று தென் தமிழத்தில் வாழும் குற்றப்பரம்பரை இனத்தவரில் இன்னமும் தம் முன்னோர் செய்த திருட்டு தொழிலைத் தொடர விளையும் சிலரைப் பற்றிய நெருக்கமான பதிவாக ஓர் ஆவணம் போல் இருக்கும் காட்சியமைப்புகளும், வசன‌ங்களும் .

தமிழ் சினிமாவில் இதுவரை குறிப்பிட்ட சில வகை நகைச்சுவைகளையே திரும்பத் திரும்பச் செய்திருக்கிறார்கள். நாகேஷ், வடிவேலு போன்றவர்களின் உடற்மொழி சார்ந்த நகைச்சுவையை Physical comedy என வகைப்படுத்தலாம். என்.எஸ்.கே., விவேக் போன்றவர்களின் சிந்தனை தூண்டும் நகைச்சுவையை Observational comedy என வகைப்படுத்தலாம். கவுண்டமணி, சந்தானம் போன்றவர்களின் வசவுகள் கொண்ட நகைச்சுவையை Insult comedy என வகைப்படுத்தலாம்.

கமல்ஹாசன், கிரேஸி மோகன் கூட்டணியின் வசன அடிப்படையிலான நகைச்சுவையை Witty comedy என வகைப்படுத்தலாம். பாலச்சந்தர், பாக்யராஜ் போன்றோர் படங்களில் வரும் பாத்திரவியல்பை ஒட்டிய‌ நகைச்சுவையை Character comedy என வகைப்படுத்தலாம். சிம்புதேவன், வெங்கட்பிரபு போன்றவர்களின படங்களில் வரும் நையாண்டி நகைச்சுவையை Spoof comedy என வகைப்படுத்தலாம். சோ ராமசாமி படங்களில் வரும் சமத்துவம் குறித்த‌ அங்க‌தத்தை Topical comedy என வகைப்படுத்தலாம்.

இவை எல்லாவற்றுக்கும் ஒரு முக்கிய ஒற்றுமை இருக்கிறது. அது இவை எல்லாமே வாய் விட்டு சிரிக்க வைப்பவை - குறைந்தப‌ட்சம் ஒரு புன்னகை உத்திரவாதம். சிரிப்பையோ புன்னகையையோ வரவழைக்காத ஆனால் அபாரமான நகைச்சுவை வகைகள் சில உண்டு - Black comedy, Blue comedy போன்றவை.

இவற்றில் Black comedy என்ற வகையில் இருட்டுத் தொழில்கள் சார்ந்த நகைச்சுவையைக் கொண்ட புஷ்கர் - காயத்ரியின் ஓரம் போ, வ குவாட்டர் கட்டிங், செல்வராகவனின் புதுப்பேட்டை, தியாகராஜன் குமாரஜாவின் ஆரண்ய காண்டம் ஆகிய படங்களைச் சொல்லலாம். ஆனால் எனக்குத் தெரிந்து தமிழில் Blue comedy என்பதே இதுவரை இல்லை. அவ்வகையிலான முதல் படம் பாலாவின் அவன் இவன்.

பாலியல் சார்ந்த, இனவியல் சார்ந்த, வக்கிரமான, அருவருப்பான ஆனால் சுவாரஸ்யமான, ரசிக்கத்தக்க நகைச்சுவையே Blue comedy என்பதாக அடியேன் புரிதல். அவன் இவன் படத்தின் முதல் இரண்டு மணி நேரம் இவ்வரையரைக்குள் கன‌கச்சிமாய்ப் பொருந்திப் போகிறது (கடைசி அரை மணி நேரம் டிபிகல் பாலா படம்).

அடுத்ததாய்ச் சொல்ல‌ வேண்டியவை எஸ்.ராமகிருஷ்ணனின் வசன‌ங்கள். குறிப்பிட்ட இனத்தாரின் வாட்டார வழக்கு தேவையான அளவு மிகை பூசிக்கொண்டு மிகச்சிறப்பாய் வெளிப்பட்டிருக்கிறது. மேற்குறிப்பிட்ட நீல நகைச்சுவை காட்சிக்கு காட்சி படத்தில் பொங்கி வழிகிறது. இவ்வகை Blue comedy படங்களில் கெட்டவார்த்தைகள் சகஜம். அவன் இவன் படத்திலும் பீ, குண்டி, குஞ்சு, மூத்திரம் போன்ற வார்த்தைகள் அள்ளித் தெளித்திருக்கிறார். ஒரு தீவிர இலக்கிய எழுத்தாளனாலேயே தன் இமேஜ் களைந்து கதாபாத்திரத்துள் புகுந்து அவன் மொழி பேசவியலும். எஸ்.ரா. முதன் முறையாக அப்படிப் பேசியிருக்கிறார். எப்படி ஜெயமோகனின் ஆகச்சிறந்த வசனங்கள் கொண்ட திரைப்படம் நான் கடவுளோ, அப்படி எஸ்.ராமகிருஷ்ணனின் ஆகச்சிறந்த வசனங்கள் கொண்ட திரைப்படம் அவன் இவன்.

பாலா படத்தில் நடிகர்களைப் பற்றி பேசாமலிருக்க முடியுமா? அவன் இவன் இருவரையும் விட படத்தில் மிகச்சிறப்பாக நடித்திருப்பவர் ஹைனஸாக வரும் ஜி.எம்.குமார். வாழ்ந்து கெட்ட ஜமீந்தாராக வரும் இவர் பின்னியிருக்கிறார் (இதே போல் ஆரண்ய காண்டத்திலும் வா.கெ.ஜ. ஆக வரும் சோமசுந்தரம் பெடலெடுத்திருக்கிறார்). மேடையில் நவரசங்களையும் காட்டும் காட்சி ஒன்றைத்தவிர மற்ற எல்லா காட்சிகளிலும் சோபிக்கிறார் விஷால் (அவர் நவரசங்களையும் காட்டும் அந்த த்ராபைக் காட்சியில் அவ‌ரை விட ஜொலிப்பவர் அதைப் பார்த்து வியந்து தன் முகபாவங்களை மாற்றிய படி இருக்கும் சூர்யா. என்ன கலைஞனய்யா அவன்!). ஆர்யாவுக்கான ஒரே ஆறுதல் நான் கடவுளை விட இதில் நடிக்க வாய்ப்பு அதிகம் என்பது மட்டுமே. அதைச் சரியாய்ச் செய்திருக்கிறார். மற்றபடி அவனைக் கட்டிலும் இவன் ச‌ற்று கம்மி தான்.

நாயகிகளில் (அவள் இவள்?) ஜனனி ஐயர் அழகு, அழகு, அழகு (நல்லவேளை, லைலா ஃபீல்டில் இருந்திருந்தால் அவரை இக்கதாபாத்திரத்தில் போட்டு நம் உயிரை வாங்கியிருப்பார் பாலா). கான்ஸ்டபிள் பேபியாக போலீஸ் யூனிஃபார்மில் ஜனனி நடந்து வரும் போது நமக்கே அவரது பிருஷ்ட சதை பற்றிக் குறைப்பட்டுக் கொள்ளத் தோன்றுகிறது (பாலா / எஸ்ரா கச்சிதமாய்க் கவனித்து வசனம் வைத்திருக்கிறார்கள்). மற்றவர் (பேரென்ன?) சும்மா டம்மிபீஸ். அம்மாக்களாக வரும் அம்பிகாவும், பிரபாவும் கவர்கிறார்கள்.

இரண்டு நாயக நாயகிகள் இருந்தும், உச்சகாட்சியில் யாரும் சேதாரமாகாமல் பிழைக்கிறார்கள் - அவ்வகையிலான பாலாவின் முதல் படம் இது (நாயகன் அல்லது நாயகி யாராவது இறுதிக்காட்சியில் சாக வேண்டுமே அவருக்கு!). நகைச்சுவைப்படம் என்பதால் அது கோரும் சுப முடிவு காரணமாய் இதில் விட்டிருக்கலாம்.

பாலா என்ற மிகச்சிறந்த இயக்குநரின் அழுத்தமான முத்திரை அழுத்தமாகப் படிந்திருக்கிறது இத்திரைப்படத்தில் (ஆர்யாவின் செயலால் ஹைனஸ் அழுது புலம்பியதை ஹைனஸ், ஆர்யா உட்பட எல்லோருக்கும் விஷால் நடித்துக் காட்டும் காட்சி ஓர் உதாரணம்). தவிர‌, த‌ன் கடைசி இரண்டு படங்களின் திரைக்கதைப் பற்றாக்குறையை இப்படத்தில் சரி செய்திருக்கிறார் பாலா. கடைசி அரை மணி நேரத்தில் திடீர் வில்லன் முளைக்கிறார் என்பதைத் தவிர திரைக்கதை மிகச்சீராகவே பிரயாணிக்கிற‌து. அவன் இவன் மட்டுமல்லாது யுவன் கூட தன் பங்களிப்பைச் சரியாகவே செய்திருக்கிறார். ஆர்தர் ஏ. வில்சன் வழமை போல்.

நல்ல திரைப்படம் என்ற அடிப்படையில் பாலா படங்களின் வரிசை:
சேது > நந்தா > அவன் இவன் > பிதாமகன் > நான் கடவுள்

சிறந்த இயக்கம் என்ற அடிப்படையில் பாலா படங்களின் வரிசை:
பிதாமகன் > நான் கடவுள் > அவன் இவன் > சேது > நந்தா

அதாவது கடந்த தசாப்தத்தில் பாலா எடுத்திருக்கும் சிறந்த படம் இது. தமிழில் மாற்று சினிமா எடுப்பதற்கான போட்டியில் தானும் இன்னும் களத்தில் இருக்கிறேன் என்பதற்கான இயக்குநர் பாலாவின் பலமான அறைகூவல் அவன் இவன்.

பின்குறிப்பு:

படம் நிறையப் பேருக்கு (யாருக்குமே?) பிடிக்கவில்லை என்பதாகத் தெரிகிறது. அவர்களுக்கெல்லாம் என் சுருக்கமான‌ பதில் மற்றுமொரு முறை படத்தை பாருங்கள் என்பதே. இங்கே ஒரு முக்கியமான விஷயத்தைக் குறிப்பிட விரும்புகிறேன். வ‌க்கிரமான விஷய‌ங்களை ரசிக்க நீங்கள் வக்கிரமற்றவராய் இருத்தல் அவஸ்யம். குணாவை நிராகரித்தோம், பின் பத்து வருடங்கள் கழித்து கொண்டாடினோம். என் அக்கறையெல்லாம் அது போல் ஆகிவிடக்கூடாது அவன் இவன் என்பது தான்.

பையா, பசங்க போன்ற‌ குப்பைகளை ஊரே கொண்டாடிய போது எனக்கு அவை பிடிக்கவில்லை என்பதைச் சொல்லத் தயங்க‌வில்லை. அதே போல் நடுநிசி நாய்கள், அவன் இவன் போன்ற‌ மாணிக்கங்களை ஊரே காறியுமிழும் போது எனக்கு அவை பிடித்திருக்கின்றன என்பதைச் சொல்லாமல் இருக்கவியலாது. கோவணாண்டிகளின் ஊரில் வேஷ்டி உடுத்த‌த் தெரிந்தும் த‌யங்குபவன் உண்மையில் அவர்களுக்கு மாபெரும் சமூகத் தீங்கிழைக்கிறான். எனக்கு அதில் உடன்பாடில்லை.

மற்ற விஷ‌யங்களை இரண்டாம் முறை படம் பார்த்து விட்டு பேசுகிறேன்.